https://www.traditionrolex.com/1

Аныгы олохпут сайдыытын кытта устуоруйа тэбис-тэҥҥэ сайдан иһэр. Урут биһиги кумааҕыга суруллубут ахтыылары, хаартыскалары көрөр эбит буоллахпытына, билигин аудиовизуальнай, о.э көрдөрөр-иһитиннэрэр эйгэҕэ куйаар ситиминэн, урукку дьон хайдах тутта-хапта, таҥна-симэнэ, саҥара  сылдьыбыттарын булан көрүөхпүтүн уонна истиэхпитин сөп.

Хаартыскаҕа: 16,35 мм кинолента турар сирэ

Саха үгэһин, төрүт дьарыгын, билиитин-көрүүтүн үөрэтэр, сырдатар сыаллах үлэм чэрчитинэн, олоҥхоһуттар тустарынан биэриини бэлэмнээрибин И.С.Жараев аатынан Саха Өрөспүүбүлүкэтин норуоттарын аудиовизуальнай нэһилиэстибэтин национальнай киинин пуондатыгар сырыттым.

Манна СӨ култууратын туйгуна, Саха сирин киинэтин бэтэрээнэ,  киномеханигынан үлэлээбит, культуролог идэлээх Марина Софроновна Винокурованы кытта билистим.

Кини бу тэрилтэҕэ сүрүннүүр испэсэлиис быһыытынан улуустары кытта уонна пуонданы хаҥатыыга үлэлиир уонна Саха сирин Киинэтин түмэлин салайар.

Хаартыскаҕа: 1961 сыл. Култуура үлэһиттэрин  I сийиэһин дэлэгээттэрэ.

–  Марина Софроновна, ханнык сыллааҕы олох былыргы уонна төһө матырыйаал хараллан сытарый?

–  Пуондабытыгар 1924 сылтан саҕалаан уһуллубут Сахабыт сиригэр буолан ааспыт түгэннэри, бырааһынньыктары, күннээҕи олоҕу, тутуллан турбут дьиэлэри, дойдубут туһугар үлэлээбит-хамсаабыт дьону көрдөрөр хамсыыр хартыыналар бааллар.

Быйыл биһиги тэрилтэбит тэриллэн үлэлээбитэ 25 сыла буолла. Бу кэм устата 35943 тахса киинэ докумуоннар, хроникально-документальнай устуулар, альманахтар биирдиилээн дьон устуулара мунньуллан киирдилэр.

– Норуот талааннаахтарын үйэтитиигэ, тарҕатыыга аныгы ньымалары туһаныы туһунан кэпсиэҥ дуо?

– Пуондабыт сыл ахсын эбиллэн иһэр. 2005 сыллаахха “Закон об аудиовизуальном наследии Республики Саха (Якутия)” диэн киинэ матырыйаалларын хомуйар, күүс-көмө  буолар сокуону бэлэмнээн, олоххо киирэригэр үлэлээбиттэрэ биһиги аксакалларбыт, уопуттаах кинематографистар  – В.А.Томскай, И.С.Жараев, Г.К.Охлопкова, А.А.Зайков уо.д.а.

Ити курдук ааспыт 2020 сыл түмүгүнэн барыта 108 пуонда оҥоһулунна. Манна култуураҕа, доруобуйа харыстабылыгар, үөрэхтээһин, бырамыысыланнас курдук салааларга саҥаттан саҥа киинэ докумуоннар киирэ тураллар. Бэйэбит эпэрээтэрдэрбитин кытта норуот талааннаахтарын көрдөрөр тэрээһиннэргэ сылдьан анал устуулары оҥоробут. Идэлээх дьон бэйэлэрин дипломнай үлэлэригэр, ахтыы кинигэни суруйалларыгар кэлэн көрөллөр, туһаналлар.

Хаартыскаҕа: эпэрээтэр Н.Сантаев киинэҕэ устуута. Ыһыах, 1968 с.

– Ким уһуллубутун, матырыйаалы үөрэтии, чопчулааһын үлэтин туһунан.

– Дьон Сахабыт сиригэр ордук суолталаах түгэннэр манна бааллар диэн бэйэлэрэ устубуттарын эбэтэр урут уһуллубут дьиэтигэр баар видео кассеталарын, DVD дискэлэрин, хаһааҥҥа эмэ кинопленка да буоллун аҕалаллар. Ону бастакы уочарат араспыыска толорон ылабыт уонна быстах кэмҥэ карантинҥа туруоран баран техническай туругун көрөн, сороҕун эмтиибит, абырахтыыбыт уонна эспиэртиир отделга ыытабыт. Эспиэр киинэ докумуон туох суолталааҕынан боротокуол толорор. Киирбит докумуоҥҥа туох уһуллубута сиһилии мүнүүтэтигэр, сөкүүндэтигэр тиийэ толоруллар, чуолкайдааһын кэмигэр туттарбыт дьонтон эбэтэр ханнык сыл буоларынан анал консультаннары ыҥыран быһаартарабыт. Ол эрэ кэннэ судаарыстба пуондатыгар киирэргэ бигэргэтии бэриллэр. Анал нүөмэр туруоруллар уонна актаҕа илии баттанар. Судаарыстыба бас билэр баайа буолар.  

– Дьон төһө уонна тугу туттарарый?

 – Үөһээ ахтыбытым курдук ким баҕарар бэйэтин устууларын аҕалан туттарыан сөп. Ол эрэн манна биллэн турар биһиги өрөспүүбүлүкэбитигэр ордук суолталааҕа диэбиппитин ылабыт. Биирдиилээн уонна анал устуудьуйалар. Тэлэбиидэнньэ эрэдээктэрдэрэ, кинорежиссердар устубут матырыйааллара элбэхтэр. Холобур, Николай Егорович Мартынов диэн уопсастыбаннай кэрэспэдьиэннээхпит. Кини Дьокуускай куоракка буолар араас тэрээһиннэри баҕа өттүнэн устар уонна биһиэхэ аҕалан туттарар. Сибээс уонна энергетика колледжын устудьуоннара бэйэлэрэ анал бырайыактаахтар. Онно устубут матырыйааллара эмиэ киирэр. Улуустартан урукку кэмнээҕи видео кассеталарын аҕалан сыыппараҕа көһөртөрөллөр уонна эмиэ туттараллар.

– Тэрилтэҕитигэр түмэл баар эбит. Киинэ түмэлигэр ханнык эспэнээттэр баалларый?

 – Сүрүн үлэм таһынан СӨ кинэтин бэтэрээннэрин кытта ситимнээхтик үлэлиибин. Арассыыйа уонна Саха Өрөспүүбүлүкэтин култууратын үтүөлээх үлэһитэ, “Бочуот Знага” уордьан кавалера, Арассыыйа бочуоттаах кинематографиһа, ССРС Кинематографиятын туйгуна, тыыл уонна үлэ бэтэрээнэ Иван Спиридонович Жараев тэрийбит Саха сирин киинэтин түмэлэ баар. Түмэл тэрилтэбит ааҕар уонна көрдөрөр саалатыгар турар. Сорох эспэнээттэрбит экспозиция буоланнар Емельян Ярославскай аатынан Хотугу норуоттар устуоруйаларын уонна култуураларын  холбоһуктаах түмэлин (Дом музей – Якутская ссылка) филиалыгар турар.

Манна Сахалартан бастакы үөрэхтээх кинооператор Никандр Егорович Саввинов “Конвас” кинокамерата, 1935 с. үлэлээбит кинопроекторга уоп ситимин нормалыыр автотрансформатор, Саха сирин киинэтин сайдыытын көрдөрөр элбэх истиэндэлэр, хаартыскалар, ахтыылар, кинопроектордар, кинокамералар, афишалар бааллар. Ону ымпыгын-чымпыгын бырытын кэпсиир кыаллыбат.

Түмэл үлэтигэр сыһыаран, тэрилтэ пуондатыгар баар киинэлэри анал бэлиэ күннэргэ анааммыт тэрээһиннэргэ көрдөрөбүт. “Экология души” бырайыакпытынан оскуолаларга уонна сайыҥҥы лааҕырдарга, бибилэтиэкэлэргэ баран көрдөрөбүт.

– Баҕа санааҥ?

– Ааспыт сыл уонна быйылгы сыл саҕаланыытыгар улахан дьаҥ туран үлэбитигэр арыый да охсуулаах курдук. Ол эрэн куйаар ситиминэн пуонда матырыйаалларын @avfond_yakutia инстаграммытыгар таһаара олоробут. Баҕалаахтар суруйтаран киирэн көрүөххүтүн сөп.

Биһиги кииммит Уһук Илин эрэгийиэҥҥэ Саха сирин туһунан киинэ докумуоннары хомуйууга, харайыыга уонна наардааһыҥҥа соҕотох идэтийбит тэрилтэ буолар. Муус устар 10 күнүгэр тэрилтэбит 25 сылын үөрүүлээхтик бэлиэтиир биир бэлиэ күнүнэн, тэрилтэбитин тэрийбит  ССРС  кинематографиятын туйгуна, Арассыыйа бочуоттаах кинематографиһа, СӨ култууратын туйгуна Виссарион Андреевич Томскайга, биир идэлээхтэрбэр инники үлэбитигэр ситиһиилэри, тус олохпутугар дьолу, доруобуйаны баҕарабын. Пуондабыт хаҥыырыгар хас биирдии Саха сирин олохтооҕо тус кылаатын киллэрэн, Саха АССР 100 сыллаах үбүлүөйүн өрө көтөҕүллэн көрсөргө ыҥырабын!

Саха сирин устуоруйатыгар ураты суолталаах киини өрөгөйдөөх бэлиэ үбүлүөйдэринэн эҕэрдэлиибит, таһаарыылаах үлэни, ситиһиини уонна матырыйаала хаҥыы турарыгар баҕарыа этибит!

Ангелина КУЗЬМИНА.