Томороон тымныыга Санкт Петербургтан «Викимедия.ру» дириэктэрэ Владимир Медейко, Ростов на Донуттан Нуучча Бикипиэдьийэтин дьаһабыла Дмитрий Жуков уонна Москубаттан Н.А. Некрасов аатынан Киин научнай бибилэтиэкэ киэҥ эйгэҕэ сырдатар салаатын салайааччыта Наталья Сенаторова ыалдьыттаатылар. Суруналыыстары кытта көрүстүлэр, Саха сирин олохтоохторун бикипиэдьийэҕэ ыстатыйаны хайдах суруйарга, киллэрэргэ үөрэттилэр. Сахалыы Бикипиэдьийэни иилээччи-саҕалааччы Николай Павлов-Халан 13 тыһыынчаттан тахса ыстатыйа киирбитин уонна бу кэскиллээх дьыалаҕа дьону-сэргэни үлэлэһэргэ ыҥырда. Маны тэҥэ саха биллэр дьонун, култууратын, билимин туһунан суруйан «Наши университеты» айар күрэххэ кыттыахха сөбүн, ыстатыйалары ханнык баҕарар тылынан тылбаастаан аан дойду күөнүгэр таһаарыы хайысхаларын туһунан кэпсээтилэр. Тэрээһиннэргэ кыттыбыт дьон олус сэргээтилэр, элбэх ыйытыылары биэрдилэр. Уопсастыбаннай бырайыак уруок ыытарга туһанар матырыйаалтан саҕалаан олох-дьаһах бары эйгэтэ сайдарыгар олус наадалаах. Биһиги эмиэ бу хамсааһыны өйөөн Бикипиэдьийэҕэ элбэх ыстатыйаларбытын таһаарабыт уонна Сахабыт сирин дьонун кыттыһаргытыгар ыҥырабыт. Хаартыскаҕа: Өрөспүүбүлүкэтээҕи медиа кииҥҥэ суруналыыстары кытта көрсүһүү түгэнэ
#сахалыы #сахалыыбикипиэдьийэ #википедия