Оҕо сахалыы түргэнник ааҕа үөрэнэригэр төрөппүккэ, учууталга аналлаах саайтар, сүбэлэр аан ситимҥэ элбэхтэр. Кыһаллыан, санаатын ууран дьаныардаахтык дьарыктаныан эрэ наада. Ол эрээри дьиҥ олох көрдөрөрүнэн төрөппүт көмөҕө наадыйар. Эбии үөрэххэ оҕону суруйтаран үөрэтэр эмиэ сөп. Ааҕыыны сүрүн көҕүлээччи син биир төрөппүт буолар. Күннээҕи олоххо оҕо күн аайы кыра кэпсээннэри ааҕан, төрөппүтүнээн утары ырытан ааҕыытын түргэтитиэн сөп. Онно сөптөөх кэпсээннэри булар тоҕоостоох. Урукку көлүөнэ интэриниэтэ суох кинигэ ааҕан ис туругун сайыннарара. Дьиҥэ, оҕо ону ааҕан эмиэ күүскэ сайдар. Ол эрээри көҥүллэммэт матырыйаал элбэҕиттэн, доруобуйаҕа да охсуулааҕынан оҕо интэриниэти ааҕарын хааччахтыыллар. Ол иһин бастакы хардыытыгар ханнык да дьарыга суох буоллаҕына, ааҕар дьоҕура кыччыыр. Онно маннык дьарыктар көмө буолаллар:
- Оҕо 4-5 сааһыттан төрөппүтү кытта дорҕоон үөрэтэн, буукубалары хартыына көмөтүнэн, алпаабыт бэрээдэгинэн үөрэтиэн сөп. 5-6 сааһыттан икки дорҕоону холбоон, дорҕоон бэлиэлэринэн сүһүөх оҥорон ааҕыан сөп. Сүнньүнэн сүһүөх ааҕыытын бастаан үөрэтиллиэхтээх. Ба-, бу-, би-, бы- … курдук. Төрөппүт оҕо 2-3 сааһыттан элбэх остуоруйалары быыс булан үчүгэй хартыыналаах кинигэттэн ааҕар, кэпсиир, ырытар, оччоҕо ааҕыыга бастакы баҕатын ордук сайыннарар. Оскуолаҕа киирэн түргэнник ааҕыыга сыстар. Кэмигэр ааҕар. Ол да кэннэ төрөппүт бибилэтиэкэттэн сөптөөх кинигэ уларсан эбэтэр атыылаһан оҕо аахпытын ырытан, ааҕыы бастакы эйгэтин тэрийэр.
- Билиҥҥи төрөппүт солом суох диэн оҕотун ааҕыытын сайыннараары араас эбии дьарыкка сырытыннарар. Ол эмиэ көмөлөөх эрээри, тапталлаах төрөппүт эрэ күүстээх үлэтэ оҕону бары өттүнэн табан сайыннарарын өйдүөх тустаахпыт.
- Аан ситим көмөтүнэн оҕо эмиэ түргэнник ааҕыан сөп. Онно төрөппүт эмиэ табан туһаныахтаах. Оҕо доруобуйатын, ис туругун харыстаан сыһыаннаһарбытын умнуо суохтаахпыт. Ити этиллибит үөрэтии хойутаабыт буоллаҕына, төрөппүт араас дьарыгы хаһан баҕарар туһанан көмөлөһүөн сөп. Оҕо сайдыыта ийэттэн-аҕаттан улахан тутулуктаах.
Сааскылаана Петровна Керемясова, СӨ үөрэҕириитин туйгуна, үрдүкү категориялаах учуутал, СӨ Бэрэсидьиэнин граанын кыайыылааҕа.